Friday, 13 September 2019

മരടിലെ ഫ്ലാറ്റുകളും സുപ്രീംകോടതി വിധിയും

പത്തു വർഷങ്ങളായി താമസിച്ചുകൊണ്ടിരിക്കുന്ന സ്ഥലം... അത്രയും കാലംകൊണ്ടുതന്നെ നികുതിയും കൊടുത്തുകൊണ്ടിരിക്കുന്നു.. വൈദ്യുതി, വെള്ളം തുടങ്ങിയ ചാർജുകളും സർക്കാരിലേക്ക് കൊടുത്തുകൊണ്ടിരിക്കുന്നു...
ഇപ്പോള്‍ 'പരിസ്ഥിതിലോലപ്രദേശ'മെന്ന കാരണത്താൽ മരടിലെ പാർപ്പിട സമുച്ചയങ്ങൾ പൊളിക്കണമത്രേ??

എന്റെ ചോദ്യമിതാണ്... ഇത്രകാലം എവിടെയായിരുന്നു ഇപ്പോള്‍ 'ഫ്ലാറ്റുകൾ പൊളിക്കണമെന്ന്' വിധി പ്രഖ്യാപിച്ച നിയമവ്യവസ്ഥ??

പരിസ്ഥിതിലോല പ്രദേശത്ത് കെട്ടിടങ്ങൾ നിർമ്മിക്കാൻ അനുവാദം കൊടുത്ത സർക്കാർ സംവിധാനങ്ങളും, നിർമ്മാണം നടത്തിയവരുമല്ലേ ഇന്നത്തെ അവസ്ഥയ്ക്ക് ഉത്തരവാദികൾ?? യഥാര്‍ഥത്തിൽ ശിക്ഷിക്കപ്പെടേണ്ടത് അവരല്ലേ?? വൈദ്യുതി കണക്ഷനും, വാട്ടർ കണക്ഷനും നൽകിയവരും ഉത്തരവാദികളല്ലേ??

ടി പാർപ്പിട സമുച്ചയങ്ങളിലെ  താമസക്കാരിൽനിന്നും ഇക്കണ്ടകാലമത്രയും സർക്കാരിലേക്ക് നികുതിയും പിരിച്ചിട്ടുണ്ടല്ലോ?? അതൊക്കെ തിരിച്ചുനൽകാൻ സർക്കാർ സംവിധാനങ്ങളും നിയമവ്യവസ്ഥയും തയാറാകുമോ??

സർക്കാർ സംവിധാനങ്ങൾക്കെതിരേയും ടി സ്ഥലത്ത് കെട്ടിടങ്ങൾ നിർമ്മിക്കാൻ അനുവാദം കൊടുത്തവർക്കും, നിർമ്മാണം നടത്തിയവർക്കെതിരെയും നിയമനടപടികൾ സ്വീകരിച്ചാൽ കിടപ്പാടം നഷ്ടപ്പെടുന്നവർക്ക് നഷ്ടപരിഹാരമോ പകരം താമസസൗകര്യങ്ങളോ  ലഭിക്കുമെന്നുണ്ടങ്കിൽ ആ വഴിക്കു നീങ്ങാനും ബാധിക്കപ്പെട്ടവർ ശ്രമിക്കണം.

സകല സമ്പാദ്യങ്ങളും മുടക്കി സ്വന്തമാക്കിയ കിടപ്പാടം നഷ്ടപ്പെടുവാൻ പോകുന്ന ഒരുകൂട്ടം മനുഷ്യരുടെ വേദന മനസിലാക്കാൻ വൈകിയവേളയിലെങ്കിലും നീതിന്യായ വ്യവസ്ഥയ്ക്ക് കഴിയട്ടെ എന്നു പ്രത്യാശിക്കുന്നു...

#ഉദ്യോഗസ്ഥ_അനാസ്ഥമൂലം_മരടിൽ_സകല_സമ്പാദ്യങ്ങളും_നഷ്ടപ്പെടുവാൻ_പോകുന്ന_ഒരുകൂട്ടം_മനുഷ്യർക്കൊപ്പം.

ശ്രീനാരായണീയ ദർശനം

ഇന്ന് ചിങ്ങമാസത്തിലെ ചതയം..
മാനവരാശിയുടെ നൻമയ്ക്കായി മഹത്തായ കാഴ്ചപ്പാടുകൾ നൽകിയ മഹാനുഭാവൻ ശ്രീനാരായണഗുരുവിന്റെ ജൻമദിനം...

പണ്ടുകാലത്ത് കേരളത്തിൽ നിലനിന്നിരുന്ന ജാതിവ്യവസ്ഥയ്ക്കും, തൊട്ടുകൂടായ്മ, തീണ്ടിക്കൂടായ്മ തുടങ്ങിയ അനാചാരങ്ങൾക്കുമെതിരെ സഹിഷ്ണുതയോടെ പ്രവർത്തിച്ചിരുന്ന സാമൂഹികപരിഷ്കർത്താക്കളിൽ ശ്രേഷ്ഠനായിരുന്നു ശ്രീനാരയണഗുരു.

മനുഷ്യരാശിക്കുവേണ്ടി ഏറ്റവും മഹത്തായ ആദർശവും കാഴ്ചപ്പാടും മുന്നോട്ടുവയ്ക്കുകയും പ്രചരിപ്പിക്കുകയും ചെയ്ത മഹാത്മാവായിരുന്നു ശ്രീനാരായണഗുരു.
''ഒരു ജാതി ഒരു മതം ഒരു ദൈവം മനുഷ്യന് ''ഇതായിരുന്നു അദ്ദേഹത്തിന്റെ ആദർശവും ജീവിതലക്ഷ്യവും. ''മതമേതായാലും മനുഷ്യൻ നന്നായാൽ മതി.'' എന്നതായിരുന്നു അദ്ദേഹത്തിന്റെ ആപ്തവാക്യം.

സാമൂഹികതിന്മകൾക്കെതിരെയും, അനാചാരങ്ങൾക്കെതിരെയും വിദ്യനേടി പ്രബുദ്ധരാകുവാനാണ് അദ്ദേഹം ആഹ്വാനം ചെയ്തത്.

പക്ഷേ വർത്തമാനകാലഘട്ടത്തിൽ അദ്ദേഹത്തിന്റെ ദർശനങ്ങൾക്കും കാഴ്ചപ്പാടുകൾക്കും മൂല്യച്യുതി സംഭവിച്ചുകൊണ്ടിരിക്കുന്നു. തന്റെ കാഴ്ചപ്പാടുകളും ആശയങ്ങളും പ്രചരിപ്പിക്കാനായി ശ്രീനാരായണഗുരു രൂപീകരിച്ച സംഘടനപോലുമിന്ന് അർഹമായ കരങ്ങളിലല്ല എത്തിപ്പെട്ടത് എന്നുള്ളത് വളരെ ദുഃഖകരമാണ്‌. വിഗ്രഹാരാധന പാടില്ല, കണ്ണാടി നോക്കി പ്രാർഥിക്കണം എന്നുദ്ഘോഷിച്ച ശ്രീനാരായണഗുരുവിനെപ്പോലും ചില്ലുകൂട്ടിലടച്ച് ദൈവമായി ആരാധിക്കുന്ന കാഴ്ച പരമദയനീയമാണ്.

ആഘോഷങ്ങളും, മനുഷ്യബന്ധങ്ങൾപോലും ജാതി-മതചിന്തകളുടെ അടിസ്ഥാനത്തിൽ നിർവചിക്കപ്പെടുന്ന ഈ കാലഘട്ടത്തില്‍ ശ്രീനാരായണീയ ദർശനങ്ങളും, ആശയങ്ങളും വളരെ പ്രസക്തമാകുന്നു.

പുതിയ തലമുറയെ ശ്രീനാരായണദർശനങ്ങൾ ആഴത്തിൽത്തന്നെ പഠിപ്പിക്കേണ്ടത് അത്യാവശ്യമായിരിക്കുന്നു. സർക്കാരുകളും ശ്രീനാരായണീയ ദർശനങ്ങൾ പിന്തുടരുന്നവരുമാണ് അതിനു മുൻകൈ എടുക്കേണ്ടത് എന്നു തോന്നുന്നു.

ജാതിമതചിന്തകൾ രാഷ്ട്രീയവും സാമൂഹികബന്ധങ്ങളും നിർണ്ണയിക്കുന്ന വർത്തമാനകാലഘട്ടത്തിൽ ശ്രീനാരായണീയ ദർശനങ്ങൾ ഉൾക്കൊണ്ട് പ്രവർത്തിക്കുക എന്നത് മാത്രമാണ് സമൂഹനൻമയ്ക്ക് കരണീയമായിട്ടുള്ളത്.

Thursday, 26 July 2018

“ആവിഷ്കാരസ്വാതന്ത്ര്യം” വ്യഭിചരിക്കപ്പെടുമ്പോള്‍

ആവിഷ്കാരസ്വാതന്ത്ര്യത്തെപ്പറ്റി പലരുമിവിടെ കൊട്ടിഘോഷിക്കുന്നതായിക്കാണുന്നു. എന്താണ് ഈ ആവിഷ്കാരസ്വാതന്ത്ര്യം?എന്തു തെമ്മാടിത്തരവും പറയാൻ മാത്രമായി സൗകര്യപൂർവം ഉപയോഗിക്കുന്ന ഒന്നാണോ ഈ വാക്ക് ??

അവഹേളനപരമായി എന്തു തെമ്മാടിത്തരവും വിളിച്ചുകൂവുന്നതല്ല ആവിഷ്കാരസ്വാതന്ത്ര്യം... കലാകാരൻ കണ്ടറഞ്ഞിതും, കൊണ്ടറിഞ്ഞതും, കേട്ടറിഞ്ഞതുമായ കാര്യങ്ങള്‍ തന്റെ ഭാവനയ്ക്കൊത്ത് സഭ്യമായി വരച്ചുകാണിക്കുന്നതാണ് ആവിഷ്കാരസ്വാതന്ത്ര്യം. അതിൽ പുരോഗമനപരമായ ഒരു സന്ദേശമുണ്ടാവണം... രചനയിൽ കഴമ്പുണ്ടാവണം.. സാമൂഹികപരിഷ്കരണത്തിനുതകുന്ന ഒരു ത്രെഡ്ഡുണ്ടാവണം..


കലാസൃഷ്ടികൾ കാലാനുസൃതമായിരിക്കണം. സ്ഥാപിതതാൽപര്യക്കാർക്ക് സൗകര്യപൂർവം ഉപയോഗിക്കാനുള്ള ഉൽപ്പന്നമായി രചനകൾ മാറാതിരിക്കാൻ കലാകാരൻ ശ്രദ്ധിക്കണം. ഇതൊന്നുമില്ലാതെ ഹിന്ദുമതവിശ്വാസപ്രകാരം ക്ഷേത്രദർശനത്തിനുപോകുന്ന സ്ത്രീകളെ അപ്പാടെ അധിക്ഷേപിക്കുന്ന പരാമർശം ഹരീഷീന്റെ നോവലായി മാതൃഭൂമി ആഴ്ചപ്പതിപ്പിൽ വന്നത് നിർഭാഗ്യകരം തന്നെയാണ്. തിരുത്തപ്പെടേണ്ട തെറ്റുതന്നെയാണതെന്നതിൽ തർക്കമില്ല.

ന്യായീകരണത്തിനായി എംടിയുടെ നിർമ്മാല്യവും, ബഷീറിന്റെ പുസ്തകവും ഉദാഹരണങ്ങളായി ചുണ്ടിക്കാണിക്കുന്നവരോട് ചോദിക്കാനുള്ളത്; നിങ്ങൾ ഉദാഹരിക്കുന്ന പുസ്തകവും, സിനിമയും, മീശയിലെ കഥാപാത്രത്തിന്റെ സംഭാഷണശകലങ്ങളും തമ്മില്‍ എങ്ങനെ പൊരുത്തപ്പെടും??

അന്ധവിശ്വാസം കൊണ്ട് ജീവിക്കുകയും, അന്ധവിശ്വാസം പ്രചരിപ്പിക്കുകയും ചെയ്ത വെളിച്ചപ്പാട്, തനിക്കു ജീവിതത്തിൽ അനുഭവിക്കേണ്ടി വന്ന നെഞ്ചുപിളർക്കുന്ന അനുഭവങ്ങളാൽ നിരാശനും,ദുഖിതനും,രോഷാകുലനുമായി ഉറഞ്ഞു തുള്ളി തലയിൽ വെട്ടി, ഒഴുകി വന്ന ചോരയും തുപ്പലും കൂട്ടിചേർത്ത് തന്റെ ഉപാസനാമൂർത്തിയായ ഭഗവതിയുടെ മുഖത്തേയ്ക്ക് കാർക്കിച്ചു തുപ്പുകയും, വാളുകൊണ്ട് വിഗ്രഹത്തിൽ ആഞ്ഞു വെട്ടുകയും ചെയ്യുന്നു... ഇതിലൂടെ നാട്ടില്‍ മനപൂർവമായോ അല്ലാതെയോ പ്രചരിച്ചിരുന്ന അന്ധവിശ്വാസങ്ങളെ തച്ചുടക്കാൻ വെളിച്ചപ്പാടിനെത്തന്നെ കലാകാരൻ ഉപകരണമാക്കുന്നു. അന്ധവിശ്വാസങ്ങൾ പ്രചരിപ്പിക്കുന്ന കപടസന്യാസികൾക്കെതിരെ ഈ കാലഘട്ടത്തിലും ഇത്തരം പ്രതികരണങ്ങൾ നടക്കുന്നില്ലേ??

ഇനി ബഷീറിന്റെ ഭഗവത്ഗീതയും കുറെ മുലകളും എന്ന പുസ്തകത്തിലേക്ക് വരാം... എഴുത്തുകാരൻ ജീവിച്ചിരുന്ന കാലഘട്ടത്തിൽ അതായത് സ്ത്രീകൾക്ക് മേൽമുണ്ട് ധരിക്കാർ അനുവാദമില്ലാതിരുന്ന ആ കാലഘട്ടത്തിൽ അനുഭവവേദ്യമായ കാഴ്ചകൾ അദ്ദേഹത്തിന്റെ രചനയിൽ പ്രതിപാദിച്ചതിൽക്കവിഞ്ഞ് എന്താണുള്ളത്?? ഹരീഷിന്റെ വിവാദ നോവൽ മീശയിലുമുണ്ടല്ലോ അതുപോലെയുള്ള കാര്യങ്ങള്‍?? അത് പക്ഷേ കഥാകാരന്റെ ഭാവനയാണന്ന് മാത്രം. അതിലൊന്നും ആരും എതിർപ്പ് പ്രകടിപ്പിച്ചിട്ടില്ലല്ലോ...

എംടിയുടേയും ബഷീറിന്റെയും സമകാലീനനല്ലാത്ത ഹരീഷിന്റെ സ്വന്തം ജീവിതാനുഭവങ്ങളിൽനിന്ന് ഉരുത്തിരിഞ്ഞ ചിന്തകളാവാം അദ്ദേഹം തന്റെ കഥാപാത്രത്തെക്കൊണ്ട് പറയിച്ചത്.


ആവിഷ്കാരസ്വാതന്ത്ര്യത്തെപ്പറ്റി വാതോരാതെ കുരയ്ക്കുന്ന അഭിനവ സാംസ്കാരിക'നായ'കരോടും, സ്വത്വം അടിയറവുവച്ച് കുഴലൂത്തു നടത്തുന്ന എഴുത്തുകാരോടും ചോദിക്കാനുള്ളത്; പവിത്രൻ തീക്കുനിയുടെ കവിത 'പർദ്ദ' എതിർപ്പിനെത്തുടർന്ന് പിൻവലിച്ചപ്പോഴും(പർദ്ദ പ്രസിദ്ധീകരിക്കുന്നതിനു ആഴ്ചകൾക്കു മുൻപ് രാമായണത്തിലെ രാമനെ പരിഹസിക്കുന്ന തരത്തിൽ 'സീത' എന്നൊരു കവിതയും പവിത്രൻ തീക്കുനി പ്രസിദ്ധീകരിച്ചിരുന്നു. പക്ഷേ അപ്പോള്‍ ഇന്ന് ഹരീഷ് നേരിടുന്നതരം ഭീഷണികളൊന്നും പവിത്രനുനേരെ ഉണ്ടായിരുന്നില്ല എന്നത് മറ്റൊരു സത്യം) ,

ലിയാനർഡോ ഡാവിഞ്ചിയുടെ 'അന്ത്യ അത്താഴം' എന്ന ചിത്രത്തെ ആസ്പദമാക്കി മലയാള മനോരമയുടെ ഉടമസ്ഥതയിലുള്ള ഭാഷാപോഷിണി മാസികയിൽ ചിത്രം വരച്ച ടോം വട്ടക്കുഴിക്കെതിരെ മെത്രാൻമാരുടെ കൈകൾ ഉയർന്നപ്പോഴും നിങ്ങളിൽ ഒരാളെപ്പോലും പ്രതികരിക്കാൻ കണ്ടില്ലല്ലോ?? നിങ്ങൾ പ്രതികരിക്കില്ല.... പ്രതികരിക്കാനായി നിങ്ങൾ ചിന്തിക്കുമ്പോൾത്തന്നെ ഒരു ദുസ്വപ്നംപോലെ ജോസഫ് മാഷിന്റെ മുഖവും കൈകളുമാവും നിങ്ങളുടെ മനസിലേക്കോടിയെത്തുന്നത്... സ്വന്തം തടി സംരക്ഷിക്കാൻവേണ്ടിമാത്രം അവസരോചിതമായ നിലപാടുകളെടുത്ത് ആവിഷ്കാരസ്വാതന്ത്ര്യമെന്ന വാക്കിനെ വ്യഭിചരിക്കരുത്.

തങ്ങൾക്ക് പ്രയോജനമെന്നുതോന്നുന്ന കാര്യങ്ങളിൽ മാത്രം 'അവസരത്തിനൊത്തുയർന്ന്' രാഷ്ട്രീയ മുതലെടുപ്പ് നടത്തുന്ന മുഖ്യമന്ത്രിയും, പ്രതിപക്ഷനേതാവുമുൾപ്പടെയുള്ള രാഷ്ട്രീയഭിക്ഷാംദേഹികളോടും പറയാനുള്ളത് ഒന്നുമാത്രം; ഹിന്ദുത്വവാദികളെ എതിർക്കാനെന്ന ഭാവത്തിൽ ഹിന്ദുമതത്തേയും ആചാരങ്ങളേയും അധിക്ഷേപം ചൊരിയുന്നവരെ സംരക്ഷിക്കുന്നതു പോരാതെ വിശ്വാസികളായ സ്ത്രീസമൂഹത്തെ മുഴുവന്‍ അഭിസാരികകളായി ചിത്രീകരിക്കുന്നതിനേക്കൂടി പ്രോൽസാഹിപ്പിക്കുന്നതുവഴി വലിയ തെറ്റുകളാണ് നിങ്ങൾ ചെയ്യുന്നത്. തീവ്രഹിന്ദുത്വവാദികളുടെ വളർച്ചക്ക് ആക്കം കൂട്ടുന്നതാണ് നിങ്ങളുടെ വികലമായ നിലപാടുകള്‍. ഹിന്ദുസമൂഹമെന്നാൽ 'ഹിന്ദുത്വവാദികൾ' ആണെന്നുള്ള നിങ്ങളുടെ അബദ്ധനിലപാടുകള്‍ തിരുത്തപ്പെടണം... അറിഞ്ഞോ അറിയാതെയോ നിങ്ങളുടെ പൂർവകാല നിലപാടുകളിൽ ചിലതെങ്കിലും തീവ്രഹിന്ദുത്വവാദികളോട് സമരസപ്പെട്ടതിനാൽ ചാർത്തപ്പെട്ട 'കളസം' തൂത്തെറിയാനുള്ള ഒരു മാർഗമായി മാത്രം ഹിന്ദുസമൂഹത്തിന്റെ വിശ്വാസങ്ങളേയും, ആചാരങ്ങളേയും തരാതരംപോലെ ഉപയോഗിക്കരുത് എന്നൊരു അപേക്ഷയുണ്ട്.

വിവാദമുണ്ടാക്കി പെട്ടന്നുള്ള ഒരു പ്രശസ്തിയും, അതിൽക്കൂടിയുള്ള സർക്കുലേഷൻ വർദ്ധനവുമാവാം കഥാകാരനും ഇടതു സഹയാത്രികനായ വീരേന്ദ്രകുമാറിന്റെ ഉടമസ്ഥതയിലുള്ള മാതൃഭൂമി വാരികയും പ്രതീക്ഷിച്ചത്. ഏതായാലും ഇത്തരത്തിലുള്ള പരാമർശങ്ങൾ നടത്തുമ്പോൾ കഥാകാരനും, പ്രസിദ്ധീകരണങ്ങളും ഏറെ ശ്രദ്ധ പുലർത്തണം.

ഹരീഷ് തന്റെ നോവൽ 'മീശ' പിൻവലിക്കണമെന്നോ, എഴുത്ത് നിർത്തണമെന്നോ, മാതൃഭൂമി അത് പ്രസിദ്ധീകരിക്കരുതെന്നോ എനിക്കഭിപ്രായമില്ല.... എന്നാൽ ഹിന്ദുസമൂഹത്തിലെ വിശ്വാസികളായ സ്ത്രീകളെ അപ്പാടെ അധിക്ഷേപിക്കുന്ന സംഭാഷണശകലങ്ങൾ പിൻവലിക്കുകതന്നെവേണം.

ആചാരങ്ങളേയും, വിശ്വാസങ്ങളേയും വിമർശിക്കാം ... പരിഹസിക്കാം .. പക്ഷേ പരിധിവിട്ടാകരുത് എന്നുമാത്രം.




കുറിപ്പ്: ഞാനൊരു വിശ്വാസിയായ ഹിന്ദുവാണ്; എന്നാൽ സംഘിയല്ല. ഇത്രയും പറഞ്ഞതിന്റെപേരിൽ വർഗീയവാദിയാക്കാനും സംഘിക്കളസം ഇടീക്കാനും വരുന്നവർക്ക് പൂഞ്ഞാറ്റിലെ ജോർജിന്റെ ഭാഷയിലാവും മറുപടി.

Sunday, 4 March 2018

ത്രിപുരയുടെ പാഠം


ത്രിപുര, മേഘാലയ, നാഗാലാന്‍റ് തുടങ്ങിയ വടക്കുകിഴക്കന്‍ സംസ്ഥാനങ്ങളിലെ തിരഞ്ഞെടുപ്പ്ഫലം പുറത്തുവന്നു. അധികാരത്തിന്‍റെ പിന്‍ബലത്തിലും, ഇതര പാര്‍ട്ടികളിലെ നേതാക്കളെ  വിലക്കെടുത്തും ബിജെപി അവിടെ വിജയം കൈവരിച്ചുഎന്നുവേണം പറയാന്‍. 

തികച്ചും ജനാധിപത്യപരമായ ഒരു വിജയമാണതെന്ന് ഒരിക്കലും ബിജെപിക്ക് അവകാശപ്പെടുവാന്‍ കഴിയില്ല.. കാരണം കൊണ്ഗ്രെസ്സ്/തൃണമൂല്‍ കൊണ്ഗ്രെസ്സ് തുടങ്ങിയ പാര്‍ട്ടികളില്‍നിന്നും അധികാരമോഹികളായവരെ പ്രലോഭനങ്ങള്‍ നല്‍കി  ചാക്കിട്ടുപിടിച്ചും, വിഘടനവാദികളുമായി സഖ്യത്തിലേര്‍പ്പെട്ടുമാണ് ഇത്ര വലിയ വിജയം അവര്‍ മേല്‍പ്പറഞ്ഞ സംസ്ഥാനങ്ങളില്‍ സ്വന്തമാക്കിയത്. മേഘാലയയിലെ കുതിരക്കച്ചവടം ഇനി കാണാന്‍ പോകുന്നു... അറുപതു നിയമസഭാ സീറ്റുകളില്‍ ഇരുപത്തിഒന്ന് സീറ്റുകള്‍ നേടി ഏറ്റവും വലിയ ഒറ്റക്കക്ഷിയായ കൊണ്ഗ്രെസ്സിനെ നോക്കുകുത്തിയാക്കിക്കൊണ്ട് കേവലം രണ്ടെണ്ണം മാത്രമുള്ള ബിജെപി അവിടെ പ്രാദേശിക കക്ഷികളുമായിചേര്‍ന്ന് സര്‍ക്കാര്‍ രൂപീകരിക്കാനുള്ള തീവ്രശ്രമത്തിലാണ്. കേന്ദ്രഭരണത്തിന്‍റെ പിന്‍ബലവും അഴിമതിയിലൂടെ സ്വരൂപിച്ച ധനവുമൊക്കെ ബിജെപി പരമാവധി ഉപയോഗിക്കുമെന്നതില്‍  യാതൊരു സംശയവുമില്ല. ഗോവയും മണിപ്പൂരുമൊക്കെ ഉദാഹരണങ്ങള്‍.

ത്രിപുരയിലും നാഗാലാന്റിലും കൊണ്ഗ്രെസ്സിന്റെ സ്ഥിതി അതി ദയനീയമായി മാറി. യഥാക്രമം പത്തും എട്ടും സീറ്റുകളുണ്ടായിരുന്ന കൊണ്ഗ്രെസ്സിനു ഇക്കുറി ഒരൊറ്റ സീറ്റുപോലും നേടാന്‍ കഴിഞ്ഞിട്ടില്ല എന്നത് ദയനീയമാണ്. പക്ഷെ സാങ്കെതികമായിപ്പറഞ്ഞു ആശ്വാസം കണ്ടെത്താം. ത്രിപുരയില്‍ പത്ത് എംഎല്‍എ മാര്‍ ഉണ്ടായിരുന്നതില്‍ ഏഴുപേര്‍ തിരഞ്ഞെടുപ്പിന് വളരെമുന്നെതന്നെ തൃണമൂല്‍ വഴി ബിജെപിയിലേക്ക് കുടിയേറി. ഫലത്തില്‍ മൂന്ന് സീറ്റുകളാണ് കൊണ്ഗ്രെസ്സിനു ത്രിപുരയില്‍ ഉണ്ടായിരുന്നത്. കഴിവുറ്റ പ്രാദേശിക നേതൃത്വവും പ്രാദേശിക പാര്‍ട്ടികളുമായുള്ള തിരഞ്ഞെടുപ്പ് നീക്കുപോക്കുകളും ശക്തമായിരുന്നെങ്കില്‍ സ്ഥിതി കുറേക്കൂടി മെച്ചമാക്കാമായിരുന്നു എന്ന് തോന്നുന്നു. സ്വാര്‍ത്ഥതാല്‍പര്യക്കാരായ ഒരുകൂട്ടം നേതാക്കള്‍ മാത്രമായിരുന്നു ത്രിപുരയില്‍ കോണ്‍ഗ്രസിനുണ്ടായിരുന്നതെന്ന് തെരഞ്ഞെടുപ്പു ഫലങ്ങള്‍ സൂചിപ്പിക്കുന്നു. പ്രാദേശികമായി ഏതെങ്കിലും ഒരു പ്രത്യേക നേതാവിനെ ആശ്രയിക്കുക എന്നതിലുപരി പാര്‍ട്ടിയുടെ ആദര്‍ശങ്ങള്‍ക്കും പാര്‍ട്ടിയുടെ ദേശീയതാല്‍പര്യങ്ങള്‍ക്കും മുന്‍ഗണന നല്‍കുന്ന നേതാക്കള്‍ക്കായിരിക്കണം കൊണ്ഗ്രെസ്സ്പാര്‍ട്ടി ചുമതലകള്‍ നല്‍കേണ്ടത് എന്ന് ഒരിക്കല്‍ക്കൂടി വ്യക്തമായി. 
  
തുടര്‍ച്ചയായി ഇരുപത്തിയഞ്ചുകൊല്ലം ഭരിച്ച സിപിഎം അതിദയനീയമായി ത്രിപുരയില്‍ പരാജയപ്പെട്ടു എന്നതാണ് ഈ തെരഞ്ഞെടുപ്പിലെ മുഖ്യ വിഷയം.ഇന്ത്യയില്‍ സിപിഎമ്മിന്റെ പ്രസക്തിതന്നെ നഷ്ടപ്പെട്ടുപോയ ഒരു അവസ്ഥയാണ് ഉണ്ടായിരിക്കുന്നത്.
സിപിഎം അവരുടെ ആശയങ്ങളില്‍നിന്നുതന്നെ വ്യതിചലിച്ച് മണിക്ക് സര്‍ക്കാരിന്‍റെ ലളിതജീവിതമാണ് പ്രചാരണമാക്കിയത്. സത്യത്തില്‍ അത് അവര്‍ക്കുതന്നെ വിനയായി എന്നുവേണം കരുതാന്‍. വിദ്യാഭ്യാസമേഖലയിലും തൊഴില്‍ മേഖലയിലും പരാജയപ്പെട്ട, വികസനം മുരടിച്ച ത്രിപുര സര്‍ക്കാരിനെ തുറന്നുകാണിക്കാന്‍ ബിജെപിക്ക് വളരെയെളുപ്പത്തില്‍ സാധിച്ചുവെന്നുവേണം കരുതാന്‍. മുഖ്യമന്ത്രിയെപ്പോലെതന്നെ ദരിദ്രമായ ത്രിപുരയെ മാറ്റിയെടുക്കുവാന്‍ പ്രധാനമന്ത്രി മോദിയുള്‍പ്പടെയുള്ള കേന്ദ്രമന്ത്രിസഭയിലെ ബഹുഭൂരിപക്ഷം മന്ത്രിമാരും പങ്കെടുത്ത തെരഞ്ഞെടുപ്പു ഉത്സവങ്ങളിലെ മോഹനസുന്ദര വാഗ്ദാനപ്പെരുമഴകള്‍ക്ക് കഴിഞ്ഞു എന്ന് തെരഞ്ഞെടുപ്പുഫലം വ്യക്തമാക്കുന്നു.

എല്ലാറ്റിലുമുപരി സിപിഎമ്മിന്റെ ധാര്‍ഷ്ട്യം, ബിജെപ്പിക്കെതിരെ തങ്ങള്‍ മാത്രമാണ് എതിരാളികള്‍ എന്നുള്ള താന്‍പോരിമ... വര്‍ഗീയശക്തികള്‍ക്കെതിരായ പോരാട്ടത്തില്‍ കൊണ്ഗ്രെസ്സിനോടുള്ള അയിത്തം... മുപ്പത്തിയഞ്ചു വര്‍ഷം ഭരിച്ചു കുളമാക്കിയ ബംഗാളില്‍നിന്നുള്ള നേര്‍ക്കാഴ്ചകള്‍ ഇവയൊക്കെയാണ് ത്രിപുരയില്‍ സിപിഎമ്മിന്റെ അടിവേരറക്കുന്നതിനു കാരണമായത്‌.
കേവലം കേരളസംസ്ഥാനത്ത് മാത്രമുള്ള പ്രാദേശികപാര്‍ട്ടിയായി സിപിഎം മാറിയിരിക്കുന്നു... അവരുടെ നിലനില്‍പ്പുതന്നെ ചോദ്യംചെയ്യപ്പെടുന്ന പരിതാപകരമായ അവസ്ഥയിലേക്ക് ചെന്നെത്തിയിരിക്കുന്നു. എന്തിനുമേതിനും കൊണ്ഗ്രെസ്സിനെ കുറ്റംപറയുന്ന രീതി അവസാനിപ്പിക്കാനും, വര്‍ഗീയശക്തികല്‍ക്കെതിരായ മുന്നേറ്റത്തിനു കൊണ്ഗ്രെസ്സിനോപ്പം അണിചേരുവാനുള്ള തീരുമാനമെടുക്കാന്‍ സിപിഎം നേതൃത്വം ആര്‍ജ്ജവം കാണിക്കണം.

വിവേചന ബുദ്ധിയില്ലാത്ത അണികളെ വിഡ്ഢികളാക്കാന്‍വേണ്ടി ചൈനയിലേയും, ക്യൂബയിലേയും, ഉത്തരകൊറിയയിലേയും നിറംപിടിപ്പിച്ച കഥകളും, അര്‍ത്ഥമില്ലാത്ത വാഗ്ധോരണികളും പ്രസ്താവനകളും നടത്തി വൃഥാ സമയംകളയാതെ ഇന്ത്യയിലേക്ക്‌ നോക്കാന്‍ സിപിഎം നേതാക്കള്‍ തയാറാവണം.

അപചയം സംഭവിച്ചുവെങ്കിലും ഇന്ത്യയിലെ എല്ലാ സംസ്ഥാനത്തുമുള്ള പാര്‍ട്ടി എന്ന നിലയില്‍ ബിജെപിയെ എതിരിടാന്‍ ശേഷിയുള്ളത് കൊണ്ഗ്രെസിനു മാത്രമാണ്. അതുകൊണ്ടുതന്നെ കൊണ്ഗ്രെസ്സ് ദുര്‍ബലമായ ഇടങ്ങളില്‍ കൊണ്ഗ്രെസ്സിനെ പിന്തുണയ്ക്കുക മാത്രമാണ് നിലനില്‍പ്പിനു വേണ്ടിയെങ്കിലും സിപിഎമ്മിനു മുന്നിലുള്ള ഏക പോംവഴി..

Friday, 23 February 2018

ഫ്രോഡുകളുടെ സ്വന്തം നാട് എന്ന് വിളിക്കാന്‍ തോന്നുന്നു...


മനുഷ്യന്‍... മനനം ചെയ്യാന്‍ കഴിയുന്നവന്‍.. വിവേചനബുദ്ധിയോടെ പ്രവര്‍ത്തിക്കുവാന്‍ കഴിയുന്നവന്‍.... ഇതൊക്കെയാണ് നമ്മളെ ഇതര ജീവിവര്‍ഗങ്ങളില്‍നിന്നു വ്യത്യസ്ഥനാക്കുന്നത്. എന്നാല്‍ കഴിഞ്ഞ കുറച്ചുകാലമായി കേള്‍ക്കുന്ന വാര്‍ത്തകളൊക്കെത്തന്നെയും ഇതിനു കടകവിരുദ്ധമാണുതാനും.

മനുഷ്യനു മനുഷ്യനോടുള്ള ക്രൂരതയ്ക്ക് ഏറ്റവുമൊടുവിലത്തെ ഉദാഹരണമാണ് അട്ടപ്പാടിയിലെ സദാചാരവാദികളുടെ മര്‍ദ്ദനമേറ്റ് കൊല്ലപ്പെട്ട മധുവെന്ന ആദിവാസിച്ചെറുപ്പക്കാരന്‍.

സമ്പൂര്‍ണ സാക്ഷരരെന്നും സാംസ്കാരിക പ്രബുദ്ധരെന്നും അഭിമാനം കൊള്ളുന്ന കേരളത്തിലാണ് ഇത് സംഭവിച്ചതെന്ന് നാമോര്‍ക്കണം. ഉത്തരേന്ത്യയില്‍ കണ്ടുവരുന്നതരം ആള്‍ക്കൂട്ടക്കൊലപാതകത്തിന്റെ മറ്റൊരുരൂപം.

മര്‍ദ്ദിച്ചവശനാക്കിയശേഷം കൂടെനിന്ന് സെല്ഫിയെടുത്ത് സമൂഹമാധ്യമങ്ങളില്‍ പ്രചരിപ്പിച്ചത് അഭിനവ സദാചാരപ്രവര്‍ത്തകരുടെ ക്രൂരമനസ്ഥിതി നമുക്ക് കാട്ടിത്തരുന്നു.

വിശപ്പിന്റെ വിളി അതിന്‍റെ പാരമ്യതയിലെത്തിയപ്പോഴാവാം മാനസികാസ്വാസ്ഥ്യമുള്ള ആ ചെറുപ്പക്കാരന്‍ മോഷണത്തിനൊരുമ്പെട്ടത്. അത് ചോദിക്കാനോ മനസിലാക്കാനൊ ഒരുമ്പെടാതെ ശിക്ഷ നടപ്പാക്കുകയായിരുന്നല്ലോ അഭിനവ സദാചാരക്കോടതി......

മോഷണമുതലുകളായി മധുവിന്‍റെ സഞ്ചിയില്‍നിന്നു കണ്ടെടുത്തതോ അല്പം അരി, മല്ലിപ്പൊടി, മുട്ട തുടങ്ങി പരമാവധി ഇരുന്നൂറു രൂപയില്‍ കവിയാത്ത സാധനങ്ങള്‍....


നികുതിദായകരുടെ കോടികള്‍ മോഷ്ടിച്ചുകൊണ്ട് നാടുവിടുന്നവരെ വീരപുരുഷന്മാരായി ആരാധിക്കുന്നു.... ഒരു നേരത്തെ വിശപ്പടക്കാനുള്ള അന്നം മോഷ്ടിച്ചവനെ തല്ലിക്കൊല്ലുന്നു.... സാംസ്കാരിക പ്രബുദ്ധരെന്നു അഭിമാനിക്കുന്ന ഒരു ജനതയുടെ മാനസികാവസ്ഥയോര്‍ത്ത് ലജ്ജ തോന്നുന്നു.

കൊല്ലപ്പെട്ടവന്‍ ആരോരുമില്ലാത്ത ആദിവാസിയായിപ്പോയി.... അവനുവേണ്ടി സംസാരിക്കാന്‍ സമുദായ പ്രമാണിമാരോ രാഷ്ട്രീയ നേതൃത്വങ്ങളോ സാംസ്കാരിക നായകരോ വരില്ല... അവനുവേണ്ടി ഹര്‍ത്താല്‍ നടത്താന്‍ ആളുണ്ടാവില്ല.... അവനുവേണ്ടി ചെറുവിരലനക്കാന്‍പോലും ഒരാളുമുണ്ടാവില്ല.

കൊല്ലപ്പെട്ടുകഴിഞ്ഞപ്പോള്‍ തല്ലിയവന്റെ രാഷ്ട്രീയമന്വേഷിക്കുന്നു ഒരുകൂട്ടര്‍... അത് മുതലാക്കി ആ രാഷ്ട്രീയപ്രസ്ഥാനതിന്റെമേല്‍ പഴിചാരാനൊരു അവസരം. അത് മാത്രമാണ് പ്രബുദ്ധരെന്നും വിദ്യാസമ്പന്നരെന്നും അഭിമാനംകൊള്ളുന്ന ജനതയുടെ നോട്ടം.

ഇന്റര്‍നെറ്റ് യുഗത്തില്‍ സഹജീവിയോടുള്ള സ്നേഹവും കരുണയും യുവാക്കള്‍ക്ക് നഷ്ടമാകുന്നുവോ??. ചെയ്യുന്നത് ക്രൂരതയാണെന്ന് തിരിച്ചറിയാനുള്ള വിവേചനബുദ്ധി ഇല്ലാതായിരിക്കുന്നുവോ നമ്മുടെ യുവതലമുറക്ക്‌??

ഒരു ഭീകരനെ പിടിച്ചെന്നപോല്‍ മര്‍ദ്ദിച്ചവശനാക്കി അവന്റെ കൂടെനിന്ന് സെല്ഫിയെടുക്കാനും അത് സമൂഹമാധ്യമങ്ങളില്‍ പ്രചരിപ്പിക്കുവാനും എന്ത് വീരസ്യമാണ് നിങ്ങള്‍ ചെയ്തത്?? കണ്ണുകള്‍ കുഴിഞ്ഞു വയറൊട്ടി എല്ലുന്തിയ ആ മുഷിഞ്ഞ വേഷധാരി ആരായിരുന്നു നിങ്ങളുടെ കണ്ണില്‍???

ചമ്പല്‍ക്കൊള്ളക്കാരെയും വീരപ്പനെയുമൊക്കെ വീരാരാധനയോടെ നോക്കുന്ന കണ്ണുകള്‍ക്ക് വിശപ്പടക്കാനായി അന്നം മോഷ്ടിച്ച ദുര്‍ബലന്‍ മഹാപാതകി... കൊള്ളക്കാരന്‍... കൊല്ലപ്പെടേണ്ടവന്‍.......

അഭിനവ സദാചാരപാലകരെ ലജ്ജ തോന്നുന്നു നിങ്ങളെയോര്‍ത്തു.... സഹതപിക്കുന്നു നിങ്ങളുടെ ദുഷിച്ച മാനസികാവസ്ഥയോട്...